ວຽກງານບຳລຸງສ້າງພະນັກງານ, ກຳມະກອນເປັນວຽກງານຕົ້ນຕໍໃນສະເພາະໜ້າ ແລະ ຍາວນານ, ເປັນເປົ້າໝາຍສຳຄັນທີ່ສຸດອັນໜຶ່ງທີ່ຈະຕ້ອງສຸມໃສ່ເຮັດໃຫ້ໄດ້. ຕາມຈິດໃຈດັ່ງກ່າວນັ້ນ, ທຸກຂັ້ນທຸກຂະແໜງ ການ ແລະ ບັນດາສະຫາຍນຳພາຕົ້ນຕໍຢູ່ໃນທ້ອງຖິ່ນແລະສູນກາງຖືບັນຫານີ້ເປັນວຽກງານອັນດັບໜື່ງຂອງຕົນ ແລະ ຕ້ອງມີແຜນການ, ແຜນກຳນົດຢ່າງຈະແຈ້ງ ເພື່ອປະຕິບັດໃຫ້ໄດ້ດີ. ກ່ຽວກັບວຽກງານບຳລຸງສ້າງພະນັກງານ ແລະ ກຳມະກອນນີ້ທຸກຂະແໜງການ, ທຸກຂັ້ນຕ້ອງຖືວຽກງານບຳລຸງສ້າງພະນັກງານຂັ້ນຮາກຖານ ( ຕາແສງ, ສະຫະກອນ, ໂຮງງານ, ກົມກອງທະຫານ ) ເປັນສຳຄັນກວ່າໝູ່, ອອກແຮງກໍ່ສ້າງບັນດາການຈັດຕັ້ງອົງການປົກຄອງ, ການຈັດຕັ້ງມະຫາຊົນ, ອົງການວິຊາສະເພາະຕາມຈິດໃຈມະຕິຄັ້ງທີ 5 ຂອງສູນກາງພັກ, ຂໍ້ກຳນົດລະອຽດຂອງສະພາລັດຖະມົນຕີ ແລະ ຂໍ້ກຳນົດຕ່າງໆຂອງຂະແໜງການວິຊາສະເພາະທາງສາຍຕັ້ງ. ມີວຽກແລ້ວຈື່ງຈະຈັດວາງຄົນເຂົ້າໃສ່, ບໍ່ແມ່ນຈັດຕັ້ງຄົນແລ້ວຈື່ງຊອກວຽກມາໃຫ້ເຮັດ. ມີການຈັດຕັ້ງຖືກຕ້ອງ ຈື່ງຈະເສີມຂະຫຍາຍຄວາມສາມາດ ແລະ ບຳລຸງພະນັກງານໄດ້ເປັນຢ່າງດີ; ເມື່ອມີຫຼາຍຄົນເຮັດວຽກງານໄດ້ດີ ການຈັດຕັ້ງຈື່ງເສີມຂະຫຍາຍຜົນສັກສິດຂອງມັນໄດ້.

( ຄັດຈາກບົດຂຽນຂອງ ປະທານ ໄກສອນ ພົມວິຫານ ທີ່ມີຊື່ວ່າ: ຕັດສິນໃຈສໍາເລັດແຜນການປີ 1979 ກຽມໃຫ້ແກ່ບາດກ້າວຂະຫຍາຍຕົວໃໝ່ ຂຽນໃນປີ 1979 )